यही फागुन १४ गते पशुपतिनाथ मन्दिर परिसरमा आयोजना हुने महाशिवरात्रि मेलाको सम्पूर्ण तयारी पूरा भएको छ। सोमबार आयोजित पत्रकार सम्मेलनमा पशुपति क्षेत्र विकास कोषले भक्तजनहरूलाई सहज र सुरक्षित रूपमा दर्शन गराउने सबै व्यवस्था मिलाइएको जानकारी गराएको छ।
प्रचारप्रसार तथा साजसजावट व्यवस्था उपसमितिका संयोजक राजकुमार खत्रीका अनुसार, भक्तजनहरूलाई दुई सेकेन्डमा दश जनाले दर्शन गर्न सक्ने गरी प्रबन्ध गरिएको छ। अघिल्लो वर्षको तुलनामा यसपटक भक्तजनहरूको उपस्थिति अझ बढ्ने अनुमान गरिएको छ। दर्शनका लागि पशुपति परिसरभित्र पश्चिम र उत्तर ढोकामा तीन/तीन तथा पूर्व र दक्षिण ढोकामा दुई/दुई लाइन राखिएको छ। साथै, प्लाष्टिक निषेधित क्षेत्र भएकाले भक्तजनलाई सोहीअनुसार सहकार्य गर्न आग्रह गरिएको छ।
मन्दिरको मूल ढोकालगायत विभिन्न स्थानहरूलाई फूल र बिजुली बत्तीले सजाइएको छ। नागाबाबाका लागि मूल मन्दिर परिसरमा धुनीको व्यवस्था गरिएको छ। फागुन १४ गते बिहान २:३० बजेदेखि १५ गते बिहीबार ६ बजेसम्म मन्दिर दर्शन खुला रहनेछ र पाँच लाखभन्दा बढी भक्तजनले प्रत्यक्ष दर्शन गर्ने अपेक्षा गरिएको छ।
शिवरात्रिको सफल व्यवस्थापनका लागि संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेको संयोजकत्वमा मूल समारोह समिति गठन गरिएको छ। सफाइ, शौचालय, खानेपानी, जुत्ता-चप्पल राख्ने स्थान, आवास, भोजन, धुनीलगायतका व्यवस्थाहरू मिलाइएको छ। सुरक्षा व्यवस्था, प्रचारप्रसार, दर्शन, रात्रिकालीन व्यवस्था, अनुगमन, चन्दन मन्दिर व्यवस्थापन लगायतका कार्यहरूमा विभिन्न उपसमितिहरूले काम गरिरहेका छन्।
महाशिवरात्रिमा भारतलगायत तेस्रो मुलुकबाट हजारौं तीर्थालु तथा पर्यटकको आगमनको अपेक्षा गरिएको छ।
