नेपालमा भ्रष्टाचार विगतदेखि नै एउटा गम्भीर चुनौतीको रूपमा रहेको छ । यो समस्या व्यवस्थामा मात्र सीमित छैन, यसको प्रभावले समाजका हरेक तहलाई गाँजेको छ । भ्रष्टाचारले विकास रोक्छ, सामाजिक न्यायलाई कमजोर बनाउँछ, र जनताको विश्वासलाई कमजोर पार्छ । यस्तो अवस्थामा युवाहरूले भ्रष्टाचारविरुद्धको लडाइँमा महत्त्वपूर्ण भूमिका खेल्न सक्छन् ।
नेपालमा भ्रष्टाचारका विभिन्न रूपहरू छन् । सरकारी निकायमा घूस, सार्वजनिक सेवामा अपारदर्शिता, ठूला परियोजनामा आर्थिक अनियमितता, र राजनीतिक पहुँचको दुरुपयोग आदि भ्रष्टाचारका मूख्य उदाहरण हुन् । यसको प्रत्यक्ष प्रभाव जनताको दैनिक जीवनमा देखिन्छ । विकासका लागि छुट्याइएका स्रोत र साधनहरू दुरुपयोग हुँदा शिक्षा, स्वास्थ्य र पूर्वाधार निर्माणमा कमजोर परिणाम देखा पर्दछ । भ्रष्टाचारले युवा पुस्तालाई पनि नराम्ररी प्रभावित गरेको छ । अवसरमा पहुँच रोकिँदा योग्य युवा विदेश पलायन भैरहेका छन् । सरकारी सेवामा माफियाको पहुँचले योग्य व्यक्तिहरू पछि पर्छन् जसले देशको बौद्धिक र सामाजिक विकासलाई रोक्छ ।
भ्रष्टाचारविरुद्ध लड्न युवाहरूले महत्वपूर्ण भूमिका खेल्न सक्छन् । युवाहरूले डिजिटल प्लेटफर्म र सामाजिक सञ्जालमार्फत भ्रष्टाचारविरुद्ध जनचेतना फैलाउन सक्छन् । अभियानहरू, बहस र जानकारीमूलक कार्यक्रमले समाजमा सकारात्मक परिवर्तन ल्याउन सक्छ । युवा पुस्ता सक्रिय भएर सुशासनका पक्षमा आवाज उठाउन सक्छन् । स्थानीय स्तरदेखि राष्ट्रिय तहसम्मका मुद्दामा सहभागी हुँदै भ्रष्टाचारविरुद्ध दबाब समूह निर्माण गर्न सकिन्छ ।
पारदर्शिता प्रवद्र्धन गर्नेस् प्राविधिक ज्ञान भएका युवाहरूले सरकारी प्रणालीलाई डिजिटलाइज गर्न र पारदर्शिता सुनिश्चित गर्न महत्वपूर्ण भूमिका खेल्न सक्छन् । युवाहरूले इमानदार र सक्षम नेताको रूपमा राजनीति प्रवेश गरेर भ्रष्टाचारविरुद्धको मोर्चालाई बलियो बनाउन सक्छन् । गाउँगाउँमा पुगेर समुदायलाई सचेत पार्न र भ्रष्टाचारको असरबारे जनतालाई सशक्त बनाउन युवाहरूले अग्रसरता लिन सक्छन् ।
यद्यपि, युवाहरूले भ्रष्टाचारविरुद्ध लड्न धेरै चुनौतीहरूको सामना गर्नुपर्छ । राजनीतिक हस्तक्षेप, सीमित स्रोतसाधन, र परम्परागत सोचले युवाहरूको प्रयासमा अवरोध पुर्याउन सक्छ । तसर्थ, युवाहरूलाई संस्थागत समर्थन, स्रोतहरूको व्यवस्थापन, र दीर्घकालीन रणनीति आवश्यक पर्छ । भ्रष्टाचारको अन्त्यका लागि शिक्षाको महत्त्वपूर्ण भूमिका हुन्छ । युवाहरूलाई शिक्षित, प्राविधिक रूपमा सक्षम र नैतिकताप्रति प्रतिबद्ध बनाउनुपर्ने आवश्यकता छ । साथै, सरकारी र गैरसरकारी संस्थाहरूले युवाहरूलाई नेतृत्वका अवसर दिनुपर्छ । भ्रष्टाचारमुक्त समाज निर्माणका लागि युवाहरू नै परिवर्तनको मुख्य साधक हुन् । उनीहरूको जोस, सिर्जनशीलता र प्रविधिको ज्ञानले नेपाललाई भ्रष्टाचारमुक्त बनाउन सक्छ । यसका लागि सबै युवाहरूले एकजुट भई इमानदार समाज निर्माणमा योगदान गर्नुपर्ने हुन्छ ।
देशको भविष्य युवाहरूको हातमा छ । उनीहरूको सक्रिया सहभागिता र इमानदार प्रयासले मात्र भ्रष्टाचारको जालो तोड्न सम्भव छ । भ्रष्टाचारविरुद्धको यो लडाइँ लामो र चुनौतीपूर्ण छ, तर युवाहरूको नेतृत्वमा देशले समृद्धिको यात्रा सुरु गर्न सक्छ । अब युवाहरूले आफ्नो सामथ्र्यलाई चिन्नु र सही दिशामा अघि बढ्नु आवश्यक छ ।
